历时八个星期嘅暑假终于落下帷幕，可以话过咗个既充实又颓废，既开心又低落嘅暑假……等飞蝗一一道来~

1.今年暑假流流长，本想日日去波场，点知变Q咗刘翔，日日对住四面墙……

             8.1号，多么令人怀念嘅日子，飞蝗又一次折翼，足足係屋企死蛇烂蟮咁踎咗两个星期，睇奥运都睇到你闷啦……日日对住只猪蹄，又肿又痛，又冇波打，睇住刘翔真係有种同病相怜嘅感觉……冇办法，日日看守屋企嘅主场，做咗n耐宅男……之后，我被朱景辉係屋企之中营救出嚟……

 2.日日行广州，行到好想踎。个个揸只兜，m记好丰收。

            本来放暑假之前呢，就已经打算今个假期唔去外省旅游，主打广州呢个市场，毕竟广州都有好多地方係我未去过嘅，所以可以行得晒广州真係梦想咁滞……咁7.24开咗广州第一团，但随后几日都因天雨情况以及团友事忙而未能发团，加上……8.1飞蝗折翼事件啦，所以广州第二团係迟迟都冇发团嘅……直到8.13，我终于迈出家门，同朱景辉导演把臂同游广州，开始咗广州摄影之旅嘅新里程~途中仲认识咗啊哲伦同学，非常有趣~

            讲起游广州就真係好多故事啦，十分经典，好多途人都貌似唔多了解我哋做乜，异样嘅目光纷纷投掷到我哋嘅身上，仲不时受到邪恶势力嘅呼喝，例如果栋国民党大楼嘅看守妇，好无情咁阻止我哋进入拍摄……既然係文物单位，点解又唔俾我哋拍呢？点解保护单位又住满晒人呢？呢啲唯有请G4去了解调查啦~

文物单位贴图：

广州真係好多地方都拆到不似原型啦，连渣都冇得剩噶

贴图：恩宁路的生命力

其实恩宁路都好靓噶~

       仲有上下九嘅飞机榄，卖飞机榄阿叔虽然其貌不扬，但係佢係想弘扬传统嘅奋斗精神先係果度卖飞机榄，收入唔高，但係都够养家活儿，係劳动者嘅典范~

          係广州咁耐都未去过陈家祠，今次终于有机会去，发觉真係好靓，十蚊入场真係值回票价，广州嘅建筑真係精细，雕刻得非常精美，无论係木头或者石头，都係咁正~

陈家祠真係值得一进！

      仲有我哋三条傻佬冒住太阳挺进白云山啦，攰到三个就嚟死咁先落到山……仲有好多好多嘅开心回忆嘅~写晒出嚟未免有啲流水账，keep in mind就算啦~得闲攞出嚟同大家分享~

      不过最印象深刻嘅就係m记……同亲辉爷出去，就係m记……哇~果排食m记真係食到惊……虽然係有折打，不过搞到我好一排都唔想食m记……一路上遇到好多热心嘅“哥哥”“姐姐”（其实都係阿伯阿婆，佢哋都唔想我哋叫得佢太老嘅，因为俾一个阿叔话我哋想人接受访问就唔好叫得人哋咁老，所以就衍生呢啲称谓），广州如此有历史~广州如此可爱~

3.人生第一次————登！登！登！登~！登报纸~

       细心留意嘅朋友，就知道我上一篇日志就係登报纸~真係可能一世人一次啊，keep住啊要~呢件事真係震撼过中国奥运代表团攞51块金牌……

4.第一次过咁开心嘅生日

       第一次过生日有女朋友陪啦，过得好happy啦，中华广场一日游，玩到两个丧心病狂~可以话今个暑假有佢陪住都好开心啦，不断发掘广州有咩新玩处……不过都冇乜收获……去得最多都係中华广场……仲有宜家家私都係一个唔错嘅选择，因为果度啲家私可以随便试，啲雪糕都几抵噶，一蚊一个，拍得住老麦啲雪糕嘅~

        基本上暑假就係咁样渡过，仲有喔，仲有同my玩星期一五打波计划，不过冇去几次我就残废咗啦……係天体消失咗三个几星期重操旧业都反应良好啦，听日正式上课，有种强烈抵触情绪，又要用一个月时间去适应，跟住又要放十一长假，翻嚟又要用两个星期去适应上课，总之就会消耗两个月时间去适应上课~颓废啊~堕落啊~